Өнгөрсөн ням гарагт ОХУ-ын нийслэл Москва хотын Улаан талбайд пионерийн улаан бүчтэй 100 сурагч жагсаалаар алхжээ. ОХУ-ын Коммунист намын төв хорооны Ерөнхий нарийн бичгийн дарга Генна́дий Зюга́новын санаачилгаар Оросын коммунист намын дор пионерийн байгууллагыг сэргээсэн юм.

Улмаар тус байгууллага 2001 оноос эхлэн жил бүр Улаан талбайд пионерийн жагсаал зохион байгуулах болсон байна. Энэ оны жагсаалд шинээр пионер болсон хүүхэд багачуудад Генна́дий Зюга́нов улаан бүчийг нь зүүж өгчээ. Улс бүр шинэ залуу үеийнхээ бие бялдар, сэтгэл зүй, оюун ухааны хөгжлийг дэмжиж, ирээдүйд улс орноо амжилттай удирдан жолоодох суурь хөрсийг бүрдүүлэхээр зорьдог.

Энэ хүрээнд Их Британид 1907 онд байгуулагдаж байсан Скаутын байгууллага өрнөдийн орнууд, тэр дундаа АНУ хүүхэд багачуудаа хүмүүжүүлж, нийгэмшүүлэх гол механизм болсон юм. Харин ЗХУ тус байгууллагатай өрсөлдөхүйц хүүхдийн байгууллагыг 1922 нээсэн нь Лениний нэрэмжит пионерийн байгууллага байжээ. 1990 оны эхээр Зөвлөлтийн блокт харьяалагдаж байсан дийлэнх оронд пионерийн байгууллагууд үүдээ барьсан түүхтэй. Гэсэн хэдий ч Хятад, Куба, Вьетнам зэрэг орны пионерийн байгууллага өнөөг хүртэл идэвхтэй үйл ажиллагаа явуулж байна.

Үүнээс гадна Орос болон өөр хэд хэдэн орны коммунист намын дор пионерийн байгууллагууд ажиллаж байгаа юм. Мөн пионерийн байгууллагын бүтэц, зохион байгуулалт дээр суурилсан хүүхэд залуучуудын шинэ байгууллагууд ч төрөн гарчээ. Та бүхэнд сануулахад, ОХУ-ын Ерөнхийлөгч Владимир Путин өнгөрсөн онд пионерийн байгууллагын бүтцэд суурилсан сургуулийн сурагчдын хөдөлгөөн байгуулах зарлигт гарын үсэг зурсан.

Энэ байгууллага Оросын хүүхэд залуучуудын боловсрол, зан суртахууныг сайжруулах, эх оронч сэтгэлгээг төлөвшүүлэхийг гол зорилгоо болгох юм байна.