Монгол Улсын Ерөнхийлөгчийн зарлигаар АНУ-ын иргэн хатагтай Мария Фернандес Хименесийг Алтангадас одонгоор шагнав. Шагналыг Ерөнхийлөгчийн Тамгын газрын дарга П.Цагаан гардуулан өглөө.

Мария Фернандес Хименесийг Алтангадас одонгоор шагнах тухай Ерөнхийлөгчийн зарлигт “Монгол Улсын тал хээрийн бүсийн бэлчээрт байгаль, экологийг дагнасан нүүдэлчдийн мал аж ахуй, байгалийн нөөцийг хамгаалах мэргэжилтнүүдийн мэдлэг, чадварыг сайжруулах, боловсон хүчин бэлтгэхэд оруулсан хувь нэмрийг нь үнэлж АНУ-ын Колорадо их сургуулийн Ой, бэлчээрийн судлалын тэнхмийн профессор Мария Фернандес Хименесийг Алтангадас одонгоор шагнасугай” гэсэн байна.

Шагнал гардуулсны дараа Ерөнхийлөгчийн Тамгын газрын дарга П.Цагаан профессор Мария Фернандес Хименест Монгол Улсын Ерөнхийлөгчийн нэрийн өмнөөс болон хувиасаа баяр хүргэж амжилт хүслээ. Профессор Мария Фернандес Хименес хариу талархал илэрхийлэн, төрийн дээд одонгоор шагнасанд Монголын төр, засагт баярлаж буйгаа хэллээ.