Сум, дүүргийн иргэдийн төлөлөгчдийг сонгох 2016 оны ээлжит сонгууль энэ сарын 19-нд болсон ч ирц  нь 50 хувьдаа хүрээгүйгээс нэмэлт сонгууль  явуулах болсон билээ. Тиймээс ирц нь хүрээгүй нийслэлийн 152 тойргийн 79 хороонд өчигдөр буюу энэ сарын 23-ны өдөр нэмэлт санал хураалт явууллаа. Багахангай, Налайх дүүргийн сонгогчид сонгуульдаа идэвхтэй оролцсон учир нэмэлт саналт хураалтыг өгөх шаардлагагүй байсан. Харин Баянзүрх, Чингэлтэй, Сонгинохайрхан, Хан-Уул, Багануур дүүргүүдэд сонгогчдын ирц хүрээгүй учраас нэмэлт санал хураалт явуулсан юм.

Дүүргийн иргэдийн төлөөлөгчдийн хурлын 295 мандат дээр нэр дэвшигчид өрсөлдөж 195-д нь МАН, 98-д нь АН, 2 бие даагч сонгогдсон байна. Нийслэлийн хэмжээнд 866 мянга 499 сонгогч бүртгэгдснээс өнгөрөгч 19-ний өдөр болсон сонгуульд 485 мянга 531 хүн саналаа өгсөн. Харин нэмэлт санал хураалтаар 70 мянга 264 сонгогч саналаа өгчээ.